Մաթոսավանք

Մաթոսավանքը 13-րդ դարում կառուցված վանք է Տավուշի մարզի Դիլիջան ազգային պարկի տարածքում։ Այն ունի պետության կողմից պահպանվող հանրապետական նշանակության հուշարձանի կարգավիճակ։

Եկեղեցին կոչվել է նաև Պղնձահանք կամ Պղնձահանքի Սբ. Աստվածածին․ այն կամարապատ ոչ մեծ կառույց է։ Մուտքի երկու կողմերում պահպանվել է երկու խաչքար, իսկ հյուսիսային կողմում՝ եկեղեցու պատի տակ, կա ևս մեկ խաչքար՝ 1251 թվականի։

Վանքի ներսի պատերն այժմ ամբողջությամբ պատված են մամուռով, և դարերի ընթացքում համալիրն այնքան է միաձուլվել բնությանը, որ երբեմն դժվար է նկատել այն։ Հուշարձանախմբից հարավ-արևելք տարածվում է գերեզմանոցը՝ անմշակ գերեզմանաքարերով և խաչքարերի պատվանդաններով։