Քաղաք Դիլիջան

Դիլիջանը Հայաստանի նշանավոր զբոսաշրջային, առողջարանային և հանգստի կենտրոններից է․ այն գտնվում է Աղստև գետի ափին՝ ծովի մակերևույթից 1100–1510 մ բարձրության վրա։ Այստեղ է գտնվում Դիլիջանի միջազգային դպրոցը (UWC Dilijan), իսկ 2016 թվականին ՅՈՒՆԵՍԿՕ-ն Դիլիջանը ներառել է Ուսման քաղաքների գլոբալ ցանցում։

Քաղաքի պատմական կենտրոնը Շարամբեյան փողոցն է՝ հայտնի իր ինքնատիպ ճարտարապետությամբ, արհեստանոցներով, պատկերասրահներով ու թանգարաններով։ Շրջակայքում են Պարզ լիճը, Գոշի լիճը, Ջուխտակ վանքը, Հաղարծինն ու Գոշավանքը, իսկ քաղաքը շրջապատող անտառները 1958 թվականից արգելանոցի կարգավիճակ ունեն։

Ավանդության համաձայն՝ Դիլիջանի անտառներում ապրող մի հովիվ սիրահարվել է իշխանավորի դստերը, և իշխանը հրամայել է նրան այնպես կորցնել խիտ անտառներում, որ այլևս ոչ ոք չգտնի։ Հովվի մայրն օր ու գիշեր փնտրել է որդուն՝ «Դի-լի՜, ջան…» կանչելով։ Ըստ մեկ այլ վարկածի՝ «դիլի ջան» նշանակում է «քաղցր լեզու», և անունը կապված է տեղացիների անուշ բարբառի հետ։

Հնում Դիլիջանի տարածքը մտել է Մեծ Հայքի Այրարատ նահանգի Վարաժնունիք գավառի մեջ, և ենթադրվում է, որ այն պատմական Հովքն է՝ Արշակունիների ամառանոցն ու որսատեղին։ Դիլիջան անվան առաջին հիշատակությունն արել է ֆրանսիացի ճանապարհորդ Ժան Շարդենն իր ուղեգրության մեջ, երբ 1664–1670 թվականներին ճամփորդել է Անդրկովկասով։

Այո՛, ONE WAY Tour-ի՝ Երևանից մեկնող տուրերը կանգ են առնում այստեղ․ դրանք ներկայացված են այս էջում։