Քաղաք Դիլիջան

Դիլիջանը Հայաստանի նշանավոր զբոսաշրջային, առողջարանային ու հանգստի կենտրոններից է։ Այն գտնվում է Աղստեւ գետի ափին՝ ծովի մակերեւույթից 1100-1510 մ բարձրության վրա։ Դիլիջանի ամենահայտնի Շարամբեյան փողոցը տեղակայված է կենտրոնում, որը լինելով քաղաքի պատմական կենտրոն, հայտնի է իր ինքնատիպ ճարտարապետությամբ, արհեստանոցներով, պատկերասրահներով ու թանգարաններով։ Քաղաքի շրջակայքում են գտնվում զբոսաշրջային կարեւոր նշանակություն ունեցող հետեւյալ վայրերը՝ Պարզ լիճ, Ջուխտակ վանք, Հաղարծին, Գոշավանք, Գոշի լիճ եւ այլն։ Դիլիջանի տարածքը հնում մտել է Մեծ Հայքի Այրարատ նահանգի Վարաժնունիք գավառի մեջ։ Ենթադրվում է, որ այն պատմական Հովքն է, որը Արշակունիների ամառանոցն ու որսատեղին էր: Դիլիջանում է գտնվում Հայաստանի եւ տարածաշրջանի նշանավոր միջազգային կրթական հաստատություններից մեկը՝ Դիլիջանի միջազգային դպրոցը։ 2016 թվականին ՅՈՒՆԵՍԿՕ-ն Դիլիջանը ներառել է Ուսման քաղաքների գլոբալ ցանցում (GNLC):