Սամսոնի վանք

Սամսոնի վանքը գտնվում է Տավուշի մարզի Կիրանց գյուղից 15 կմ հարավ-արևմուտք։ Այն թաքնված է անտառներում և բավական հեռու է բնակավայրերից։

Ճարտարապետական ձևերով հուշարձանները վերագրվում են 12-13-րդ դարերին։ Ըստ ժողովրդական ավանդության՝ վանքը կառուցել է որմնադիր Սամսոնը, իսկ մատենագրական աղբյուրներում դրա մասին տեղեկություններ չեն պահպանվել։

Համալիրը բաղկացած է երկու եկեղեցուց, կիսավեր մատուռից, բնակելի և օժանդակ շենքերի մնացորդներից, որոնք կառուցված են մոխրագույն ավազաքարով, սրբատաշ քարերով և կրաշաղախով։ Գլխավոր եկեղեցին համարյա կանգուն է, պատերին պահպանվել են կրոնական որմնանկարների մնացորդներ, իսկ շրջակայքում մնացել են միջնադարյան գերեզմանատունն ու բնակատեղին։