Հաղթանակ Զբոսայգի

Զբոսայգու, որն այն ժամանակ կոչվում էր Արաբկիրի քաղաքային այգի, կառուցումն սկսվել է 1930-ական թվականներին, իսկ Հայրենական մեծ պատերազմի ավարտից հետո այն վերանվանվել է Հաղթանակի զբոսայգի։ Ճարտարապետ Ռաֆայել Իսրայելյանի նախագծած հուշահամալիրը բացվել է 1950 թվականի նոյեմբերի 29-ին՝ Իոսիֆ Ստալինի 17 մետրանոց արձանով։

1950 թվականին բացված Ստալինի արձանի պատճառով երևանցիները համալիրը, այգին և թաղամասն այսօր էլ անվանում են Մոնումենտ։ Արձանն ապամոնտաժվել է 1962 թվականին։

Ստալինի արձանի ապամոնտաժումից տարիներ անց պատվանդանի վրա տեղադրվեց Արա Հարությունյանի «Մայր Հայաստան» 22 մետրանոց արձանը՝ որպես հայ կնոջ հավաքական կերպար։ Եռահարկ պատվանդանի ներսում 1970 թվականից գործում է թանգարան, որը 1995 թվականին վերանվանվել է «Մայր Հայաստան» զինվորական թանգարան։

Այգում են գտնվում Արևիկ արհեստական լիճը (1958–1961), որը կրկնում է Սևանա լճի ուրվագիծը և ունի մինչև 8,5 մ խորություն, ինչպես նաև 1977 թվականին կանգնեցված «Ո՛չ պատերազմին» քանդակը՝ ճարտարապետ Ֆելիքս Զարգարյանի և քանդակագործ Վահան Խաչիկյանի հեղինակությամբ։ 1983–1985 թվականներին կառուցվել է Հերոսների ծառուղին, և վերակառուցվել է Անհայտ զինվորի գերեզմանը՝ հավերժական կրակով։