Կիեվյան կամուրջ

Կիևյան կամուրջը Երևանում է՝ Հրազդան գետի վրա։ Լինելով Կիևյան փողոցի շարունակությունը՝ այն կապում է քաղաքի կենտրոնը Արաբկիր, Աջափնյակ և Մալաթիա-Սեբաստիա վարչական շրջանների հետ։

Կամուրջը կառուցվել է 1956 թվականին Երևանի գլխավոր ճարտարապետ (1950–1959 թթ.) Գրիգոր Աղաբաբյանի նախագծով։ Այն կանգնած է նախկինում այստեղ գոյություն ունեցած հին կամրջի տեղում, ուստի կոչվում է նաև Հրազդանի մեծ կամուրջ։

Կամրջի երկարությունը 364 մ է, լայնությունը՝ 26 մ, թռիչքի բարձրությունը՝ 58,3 մ։ Այն համարվում է Երևանի խոշորագույն ինժեներական կառույցներից մեկը։

Կամրջից գեղեցիկ տեսարան է բացվում դեպի Հրազդանի կիրճ։