Պերճ Պռոշյանի Տուն Թանգարան

Մարզ

Արագածոտն

Հեռավորությունը Երևանից

21.7 Կմ

Տեսակ

Թանգարան

Պերճ Պռոշյանի տուն-թանգարանը գտնվում է հին Աշտարակի սրտում՝ Կարմրավոր, Ծիրանավոր, Սպիտակավոր եկեղեցիներ տանող ճանապարհների խաչմերուկում, Քասախ գետի հին կամրջի հարեւանությամբ. Հայ դասական գրող Պերճ Պռոշյանը ծնվել է 1837 թվականի հունիսի 15-ին Աշտարակ քաղաքում։ Պերճ Պռոշյանի տուն-թանգարանը հիմնադրվել է 1948 թվականի մայիսի 16-ին, մեծանուն գրողի ծնված տանը։ Ի սկզբանե թանգարանն իրենից ներկայացնում էր միայն Պռոշյանների տան հացատունն ու երկու փոքրիկ սենյակները, հետագայում՝ 1965 թվականին, կառուցվում է եւս մեկ սենյակ, իսկ 1990 թվականին կառուցվում է արդեն թանգարանի ներկայիս՝ երկհարկ շենքը։ Թանգարանի ցուցասրահում ներկայացված են Պռոշյանի կյանքին, գրական-հասարակական գործունեությանը վերաբերող նյութեր, նկարներ եւ անձնական իրեր։ Պռոշյանը բազմաթիվ վեպերի, վիպակների, պատմվածքների հեղինակ է, թարգմանություններ է կատարել ռուս եւ համաշխարհային գրականությունից։ Նրա վեպերի հիման վրա գրվել են պիեսներ եւ բեմադրվել տարբեր բեմերում։ Պռոշյանը մահացել է 1907 թվականի նոյեմբերի 23-ին Բաքվում։ Թաղված է Թիֆլիսի Խոջիվանքի գերեզմանատանը։ Թանգարանը կարեւոր նշանակություն ունի քաղաքի մշակութային կյանքում։ Այստեղ մշտապես կազմակերպվում են տարատեսակ միջոցառումներ։