Օձի Պորտ

Ավանդության համաձայն, գյուղում կար մի դպրոց, որտեղ կաթողիկոս Հովհան Օձնեցին կրթում էր իր 7 աշակերտներին: Հանկարծ լեռան լանջին հայտնվում է մի վիշապ եւ նրա արձակած ձայներից շրջակայքը քարանում է: Հովհանն իր աշակերտներից յուրաքանչյուրին ուղարկում է պարզելու տեղի ունեցածը, սակայն նրա 7 աշակերտներից ոչ մեկը չի վերադառնում՝ հայտնվելով վիշապի երախում: Հովհանն ինքն է դուրս գալիս դպրոցից փնտրելու իր աշակերտներին, փոխարենը տեսնում է հսկա վիշապին, որը պատրաստվում էր ընդունել իր հաջորդ զոհին: Հովհան Օձնեցին գավազանով խփում է վիշապի գլխին ու ասում. «Քա՛ր դառնաս, աղբյուր բխի քո սրտից՝ հիվանդի համար դե՛ղ դառնաս»: Սուրբ իմաստունի ասածն իսկույն կատարվում է եւ վիշապը քարանում է, ու նրանից սկսում է ջուր հոսել։