Հոռոմայրի վանք

Մարզ

Լոռի

Հեռավորությունը Երևանից

164.2 Կմ

Տեսակ

Վանք/եկեղեցի

Լոռու մարզի Օձուն գյուղից ոչ շատ հեռու է գտնվում Հոռոմայր վանական համալիրը, որը բաղկացած է երկու հուշարձանախմբերից՝ Ներքին եւ Վերին։ Ներքին հուշարձանախումբը տեղադրված է ժայռի ստորոտին, իսկ Վերինը՝ ձորի եզրին՝ բարձրադիր դիրքում, ինչը պատճառ է դարձել, որ այն կրի նաեւ «Ձորաեզրի վանք» անվանումը։ Վերին հուշարձանախումբը կազմված է իրար կից կառուցված երկու եկեղեցիներից, գավթից եւ հարակից գերեզմանատնից։ Հարավային եկեղեցին՝ հայտնի նաեւ որպես Ծիրանավոր Սբ. Նշան, կառուցվել է 1206 թվականին՝ առաջնորդ Սամուելի եւ վանքի միաբանության ջանքերով։ Կառույցը միանավ բազիլիկ է՝ թաղակապ ծածկով, կառուցված կապտավուն բազալտով։ Դրա հյուսիսային մուտքի կիսակամար շրջանակի վրա պահպանվել է շինարարական արձանագրությունը, իսկ արեւելյան պատուհանի բարավորին պահպանվել է նաեւ շինարար վարպետ Գրիգոր քարգործի անունը։ Հյուսիսային եկեղեցին եւ դրա հետ միաժամանակ կառուցված գավիթը թվագրվում են 13-րդ դարի կեսով։ Հյուսիսային եկեղեցին միանավ թաղակապ կառույց է՝ դեղնաշագանակագույն ֆելզիտե սրբատաշ քարերով։ Նրա մուտքը հյուսիսային կողմում է եւ բացվում է անմիջապես գավթի մեջ։ Արեւմտյան պատի արտաքին մասը զարդարված է խաչապատկերներով։