Արդվիի Սբ. Հովհաննես

Լոռու մարզի Արդվի գյուղի հյուսիսարեւմտյան եզրին է գտնվում Սրբանես վանքը՝ առավել հայտնի որպես Արդվիի Սբ. Հովհաննես։ Վանական համալիրը կազմված է երկու թաղածածկ եկեղեցիներից, զանգակատնից, եկեղեցական եւ տնտեսական կառույցներից, շուրջը տարածվող պարսպից: Եկեղեցիները կառուցված են ոչ մեծ, անկանոն, ճեղքված անդեզիտի քարերով։ Արեւելյան պատի ստորին շարքերը՝ խոշոր սրբատաշ քարերից, վկայում են հնագույն շերտերի մասին։ Հյուսիսային եկեղեցին փոքր է, քառակուսի աղոթասրահով, իսկ հարավային դահլիճը հատակին ունի տապանաքարեր։ 13-րդ դարում արեւմտյան ճակատին կցվել է փոքր սրահ, իսկ 17-րդ դարում՝ զանգակատուն՝ խորանարդաձեւ ստորին ծավալով եւ վեցասյուն ռոտոնդայով։ Վանքի հարեւանությամբ պահպանվել են խուցերի եւ տնտեսական շենքերի ավերակները, իսկ արեւմտյան կողմում՝ միջնադարյան գերեզմանոցը՝ գեղաքանդակ խաչքարերով։ Դարեր շարունակ այս վայրը եղել է նաեւ ուխտատեղի, իսկ 19-րդ եւ 20-րդ դարերում վերանորոգվել է Ստեփանոս Տարինյանի, Մելիքսեթ Քալանթարյանի եւ վերջերս՝ բարերար Վահե Կարապետյանի նախաձեռնությամբ։