Եղեգնաձորի Երկրագիտական Թանգարան

Եղեգնաձորի երկրագիտական թանգարանը հիմնադրվել է 1968 թվականին և Վայոց ձորի մարզի կարևորագույն մշակութային ու գիտակրթական օջախներից է։ Այստեղ պահպանվում է Վայոց ձորի նյութական մշակույթի ամենամեծ հավաքածուն՝ ավելի քան 12 000 ցուցանմուշ։

Թանգարանում կան հնագիտության, դրամագիտության, ազգագրության, անձնական ֆոնդերի, քանդակագործության, բնության և այլ բաժիններ։ Հնագիտության բաժնում ներկայացված են Վայոց ձորում տարբեր ժամանակներում հայտնաբերված եզակի պատմական նմուշներ, իսկ ազգագրական հավաքածուն պատմում է 17–20-րդ դարերի պատմության, կենցաղի, սովորությունների ու հավատալիքների մասին։

Թանգարանի ամենաթանկարժեք ցուցանմուշներից է 14-րդ դարի ճարտարապետ Մոմիկի կերտած խաչքարը։ Դրամագիտության բաժնում ներկայացված են նաև պղնձե և արծաթե մետաղադրամներ, կնիք-մատանիներ, մեդալներ և շքանշաններ։