Գլաձորի Համալսարան Պատմամշակութային Արգելոց-թանգարան

Արգելոց-թանգարանը գտնվում է Վայոց ձորի մարզի Վերնաշեն գյուղում։ Ցուցադրությունը կազմակերպված է Վերնաշենի Սուրբ Հակոբ եկեղեցում և ամբողջանում է Թանահատի վանական համալիրով։

Ավելի քան 250 ցուցանմուշ, որոնք պատմում են համալսարանի հիմնադրման, գործունեության և միջնադարյան Հայաստանի հոգևոր, գիտական ու հասարակական կյանքում նրա դերի մասին։ Թանգարանը հիմնադրվել է 1984 թվականին՝ Գլաձորի համալսարանի 700-ամյակի առթիվ, պատմամշակութային հուշարձանների պահպանության, ուսումնասիրության և հանրահռչակման նպատակով։

Միջնադարյան համալսարանը գործել է XIII–XIV դարերում և հայտնի էր «Երկրորդ Աթենք պանծալի» և «Մայրաքաղաք իմաստության» պատվանուններով։ Այն կրոնական, հասարակական-քաղաքական, փիլիսոփայական և ստեղծագործական մտքի զարգացման կարևորագույն կենտրոն էր։

Այստեղ բարձրագույն կրթություն են ստացել, գործել և ստեղծագործել ժամանակի անվանի հայ մտավորականներ Ներսես Մշեցին, Եսայի Նչեցին, Ստեփանոս Տարսայիճը, Հովհաննես Որոտնեցին, Խաչատուր Կեչառեցին, Ավագը, Մոմիկը և ուրիշներ։