Վազգեն Սարգսյանի Տուն-Թանգարան

Տուն-թանգարանը նվիրված է հայ ազգի նվիրյալ, ռազմական եւ հասարակական-քաղաքական գործիչ Վազգեն Սարգսյանի կենսագործունեությանը։ Այստեղ կարելի է ծանոթանալ նրա կյանքին ու կենսագրությանը՝ որպես գրողի, զինվորի, սպարապետի եւ պետական գործչի։

Տուն-թանգարանը գտնվում է Արարատի մարզի Արարատ գյուղում։

Տուն-թանգարանը բացվել է 2001 թվականի մարտի 5-ին՝ սպարապետի ծննդյան օրը։ Ամեն տարի մարտի 5-ին թանգարանում կազմակերպվում են տարատեսակ միջոցառումներ։

Թանգարանը ներկայացնում է Վազգեն Սարգսյանի կյանքի ու կենսագրության պատմությունը։ Բակում տեղադրված է սպարապետի կիսանդրին, որի հեղինակը քանդակագործ Կամսար Ղազարյանն է։

Նրա կյանքում չափազանց մեծ դեր է ունեցել գրականությունը․ նրա ստեղծագործությունները տպագրվել են «Գարուն» եւ «Սովետական գրականություն» ամսագրերում, «Հայաստանի աշխատավորուհի» եւ «Գրական թերթ» թերթերում։ 1997 թվականի օգոստոսի 14-ին նա լողալով անցել է Սեւանը մի ծայրից մյուսը՝ 7 կմ ջրային տարածքը հաղթահարելով 4 ժամ 50 րոպեում։