Սատանի Կամուրջ

Տաթեւի վանքի ստորոտում, Որոտան գետի մոտ 500 մ խորությամբ կիրճում է գտնվում Սատանի կամուրջը։ Այն բնական ծագմամբ քարե կամուրջ է, որը ձեւավորվել է հազարավոր տարիների ընթացքում՝ լավային զանգվածների վրա ջրի եւ քամու անընդհատ ֆիզիկական եւ քիմիական ազդեցության արդյունքում։ Սատանի կամրջի երկարությունը հասնում է 30 մետրի, իսկ լայնությունը՝ շուրջ 60 մետրի։ Կամրջի տարածքը գրավում է զբոսաշրջիկներին ոչ միայն իր անսովոր տեսքով, այլեւ բուժիչ հատկություններով հայտնի տաք աղբյուրներով։ Տարածքում հնարավոր է նաեւ տեսնել մի շարք քարանձավներ, որոնք գտնվում են աղբյուրներից ցած․ դրանք կարելի է տեսնել դեպի գետն իջնելու դեպքում։ Այս քարանձավները մասամբ են հետազոտված եւ պահպանում են իրենց խորհրդավորությունն անգամ մեր օրերում։