Ազգային պատկերասրահ

Այն երկրի ամենամեծ ու գլխավոր գեղարվեստական թանգարանն է՝ հիմնադրված 1921 թվականին։ Նրա հավաքածուները ընդհանուր պատկերացում են տալիս հայ ազգային կերպարվեստի մասին և ներկայացնում են նաև օտար երկրների արվեստը՝ հնագույն ժամանակներից մինչև մեր օրերը։

Պատկերասրահն ունի 56 ցուցասրահ, իսկ նրա հավաքածուն ընդգրկում է ավելի քան 40 000 թանգարանային առարկա՝ հայկական, ռուսական և եվրոպական արվեստի նմուշներ։ Հայկական կերպարվեստի հավաքածուով այն աշխարհում ամենամեծ թանգարանն է։

Այստեղ կարելի է տեսնել Հովհաննես Այվազովսկու, Մինաս Ավետիսյանի, Մարտիրոս Սարյանի, Օգյուստ Ռոդենի, Պիտեր Պաուլ Ռուբենսի, Տինտորետտոյի, Գուստավ Կուրբեի, Մարկ Շագալի, Հարություն Կալենցի և այլոց աշխատանքները։ Հովհաննես Այվազովսկու աշխատանքների հավաքածուով պատկերասրահը աշխարհում երկրորդն է։

Այս բաժինը մեծ հետաքրքրություն է ներկայացնում․ այստեղ պահվում են ցուցանմուշներ՝ սկսած Հին Եգիպտոսից և Հին Հունաստանից մինչև 18–19-րդ դարերի գերմանական, ֆրանսիական, հոլանդական և այլ երկրների ճենապակու նմուշներ։