Մաշտոցի Պողոտա

Մաշտոցի պողոտան Երևանի ամենամեծ ու կենտրոնական պողոտաներից մեկն է։ Այն սկսվում է Հաղթանակի կամրջից և ավարտվում Մատենադարանով։

Պողոտան կրում է Մեսրոպ Մաշտոցի անունը, ով ստեղծել է հայերեն գրերը, բացել առաջին հայագիր դպրոցը և սկիզբ դրել թարգմանչական գործին։ Պատմական տարբեր ժամանակներում այն ունեցել է այլ անուններ ևս՝ Արմյանսկայա, Սունդուկյան, Ստալինի, ապա Լենինի։

Պողոտայում է գտնվում 1760-ական թվականներից պահպանված պատմաճարտարապետական հուշարձանը՝ Կապույտ մզկիթը, ինչպես նաև Երևանի ամենահին կինոթատրոնը՝ Նաիրին։ 1959 թվականին այստեղ բացվել է Մատենադարանը՝ ձեռագրերի պահպանման աշխարհի ամենահարուստ կենտրոններից մեկը։

Հաղթանակի կամուրջը, որից սկսվում է պողոտան, բացվել է 1945 թվականին, իսկ «Փակ շուկա» շենքի շինարարությունն ավարտվել է 1952 թվականին։