Հյուսիսային Պողոտա

Հյուսիսային պողոտան Երեւանի հետիոտնային փողոց է, որն այդպես է կոչվում, քանի որ ձգվում է Հանրապետության հրապարակից դեպի հյուսիս։ Այն քաղաքի ամենամարդաշատ փողոցներից մեկն է եւ համարվում է Երեւանի ժամանակակից խորհրդանիշներից մեկը։

Հյուսիսային պողոտան միմյանց է կապում Երեւանի երկու կարեւորագույն հրապարակները՝ Հանրապետության եւ Ազատության հրապարակները։

Հյուսիսային պողոտայի գաղափարին Ալեքսանդր Թամանյանն անդրադարձել էր դեռեւս 1924 թվականին՝ իր մշակած Երեւանի առաջին Գլխավոր հատակագծում։ Շինարարական աշխատանքները սկսվել են 2001 թվականին եւ ավարտվել 2007 թվականին։

Պողոտայի սկզբնամասում քանդակագործ Արտո Չաքմաքչյանի «Քայլող մարդը» արձանն է, որը խորհրդանշում է զարգացում եւ առաջադիմություն։ Պողոտայում կան ինչպես բնակելի տարածքներ, այնպես էլ բազմաթիվ բրենդային խանութներ, սրճարաններ, գրասենյակներ եւ այլ հաստատություններ։