Հատիս լեռ

Հատիս լեռը գտնվում է Կոտայքի մարզի Կապուտան գյուղից 2,5 կմ հարավ-արևելք, և նրա բարձրությունը 2528 մ է։ Լեռը հնարավոր է տեսնել նաև Երևանից։

Լեռն ունի հրաբխային ծագում և կոնաձև է, լանջերը կտրտված են խոր ձորակներով, կան ժայռոտ ելուստներ։ Լեռան հարավային ստորոտից սկիզբ են առնում Քառասունակն աղբյուրները։

Լեռը կոչվում է նաև Հադիս և Շամիրամ։ Հադիս անունը համապատասխանում է հունական դիցաբանության ստորգետնյա աշխարհի և մեռյալների թագավորության տիրակալ Հադեսին, ով առնչվում է մեռնող և հարություն առնող աստված Արային, իսկ Շամիրամ անունը պայմանավորված է Արայի լեռան դիմաց գտնվելով և խորհրդանշում է Արա Գեղեցիկի ու Շամիրամի ավանդազրույցի ակունքները։

Լեռան վրա պահպանվել են Շամիրամի բերդի ավերակները, ինչպես նաև մի փոքրիկ քարանձավ։