Ասլամազյան Քույրեր Պատկերասերահ

Սա Մարիամ եւ Երանուհի Ասլամազյանների պատկերասրահն է, որը բացվել է 1987 թվականին եւ անմիջապես դարձել Գյումրիի մշակութային կյանքի կարեւոր մասնիկներից մեկը։ Այն գտնվում է 1880-1900 թվականներին կառուցված սեւ տուֆե նախկին բնակելի տանը եւ ներառված է քաղաքի պատմության եւ մշակույթի անշարժ հուշարձանների ցանկում։

Այստեղ ցուցադրվում են Մարիամ եւ Երանուհի Ասլամազյանների գեղանկարչական, գրաֆիկական եւ խեցեգործական ավելի քան 620 բնօրինակ աշխատանքներ․ առաջին հարկը նվիրված է Երանուհու, երկրորդը՝ Մարիամի աշխատանքներին։ Գեղանկարներից բացի՝ այցելուները կարող են տեսնել Մարիամի խեցեգործական ափսեները, Երանուհու կավե իրերը եւ քույրերի ձեռագործ այլ նմուշներ՝ թասեր, սպասք ու մոմակալներ։

1988 թվականի երկրաշարժից շենքը մեծապես տուժել է եւ ժամանակավորապես օգտագործվել է որպես կացարան անօթեւան մնացած գյումրեցիների համար․ միայն տարիներ անց այն վերադարձել է իր բուն գործառույթին՝ կրկին դառնալով պատկերասրահ։ Շենքը վերակառուցվել է 2003 թվականին «Լինսի» հիմնադրամի աջակցությամբ։

Մարիամն ու Երանուհին մեծացել են մշակութային միջավայրում․ նրանց հայրը՝ Արշակ Ասլամազյանը, ընկերություն էր անում ճարտարապետներ Թորոս Թորամանյանի ու Նիկողայոս Բունիաթյանի, արեւելագետ Հովսեփ Օրբելու եւ պատմաբան ու լեզվաբան Նիկողայոս Մառի հետ։ Քույրերը մեծ դեր են ունեցել Սովետական Միության արվեստի ու մշակույթի պատմության մեջ, իսկ Մարիամի որոշ աշխատանքներ պահվում են Պետական Տրետյակովյան պատկերասրահում։