Հովհաննես Շիրազի Տուն-Թանգարան

Մարզ

Շիրակ

Հեռավորությունը Երևանից

120.5 Կմ

Տեսակ

Թանգարան

1983 թվականին հիմնադրվում է անվանի հայ գրող Հովհաննես Շիրազի տուն-թանգարանը, որն ընդգրկված է Գյումրու պատմության եւ մշակույթի անշարժ հուշարձանների ցանկում։ Տուն-թանգարանը գտնվում է Վարպետաց փողոցում: Արեւմտյան ճակատն ունի շքեղ դարպաս, որը տանում է դեպի ներսի բակ: Այս տունը բանաստեղծին նվիրել են 1983 թվականին, սակայն նա մեկ տարուց էլ քիչ է ապրել այնտեղ, քանի որ տունը ստանալուց ընդամենը մեկ տարի անց մահացել է։ Նախկինում տունը պատկանել է մի մեծահարուստի, իսկ 1988 թվականի ավերիչ երկրաշարժից հետո այնտեղ ապրել են մարդիկ, ովքեր կորցրել էին իրենց տունը։ Տարիներ շարունակ մեծ ջանքերի արդյունքում այդ տունը վերակառուցվել եւ վերափոխվել է, իսկ 2003 թվականին եղել է Հովհաննես Շիրազի տուն-թանգարանի պաշտոնական բացումը: Թանգարանում ցուցադրվում են Հովհաննես Շիրազի անձնական իրերը, ձեռագրերն ու տպագրված գրքերը։ Տունը բաղկացած է վեց սենյակից։ Առաջին սենյակը պատմում է բանաստեղծի մանկության տարիների մասին, իսկ հաջորդ սենյակը կահավորված է այնպես, ինչպես եղել է նրա ապրած ժամանակ։ Մնացած սենյակներում ներկայացված են Շիրազի ստեղծագործական աշխատանքները, նկարները, անձնական իրերն ու այլ արժեքավոր ցուցանմուշներ։