Խնձորեսկ, Քարահունջ, Շաքիի ջրվեժ, Արենի գինու գործարան

1. Խնձորեսկ

Վայր, որտեղ դուք կտեսնեք ժայռերի կուտակում եւ դժվարությամբ կհավատաք, որ այդտեղ եղել են բնակելի թաղամասեր, իսկ Խնձորեսկի բնակչությունը հասնում էր 10-15 հազարի դեռ նախորդ դարի սկզբին։ Մարդիկ ժայռափոր տներում ապրում էին մինչեւ 1950-ական թվականները։ Լինելով պատմական նշանակության գյուղ` Խնձորեսկը հաճախ է հիշատակվում ազգային պայքարի էջերում: Այստեղ է նաեւ Մխիթար Սպարապետի գերեզմանը, որն ազատագրական շարժման ղեկավարներից էր 18-րդ դարում։ Քարանձավե գյուղի ամբողջականությունը լրացնում է կիրճի վրա կառուցված ճոճվող կամուրջը՝ մինչեւ 63 մետր բարձրությամբ եւ 160 մետր երկարությամբ։ Ի դեպ, անվանումը եւս կապված է կիրճի խորության հետ, որն ի սկզբանե եղել է Խորձորեսկ։

2. Քարահունջ

Քարահունջը (կամ Զորաց Քարեր) հնագույն հնագիտական վայր է Հայաստանում, որը հաճախ անվանում են «Հայկական Սթոունհենջ»։ Այն գտնվում է Սիսիանի մոտ և բաղկացած է ավելի քան 200 մեծ քարե մենհիրներից, որոնցից մի քանիսը ունեն կլոր անցքեր։ Դրանց դասավորությունը ենթադրաբար ունեցել է աստղագիտական նշանակություն։ Ավելի քան 7,500 տարվա պատմություն ունեցող Քարահունջը համարվում է աշխարհի ամենահին աստղադիտարաններից մեկը, որը հնարավոր է օգտագործվել երկնքի ուսումնասիրության համար։ Վայրը մնում է հանելուկային և գրավում է պատմաբանների, հնագետների ու զբոսաշրջիկների ուշադրությունը։

3. Շաքիի ջրվեժ

Բնության աննկարագրելի տեսարանները եզրափակում է Շաքիի ջրվեժը։ 16 մետր բարձրությամբ ջրվեժը պատմում է մի գեղեցիկ լեգենդ, ըստ որի Շաքի անունով աղջիկը փրկվում է ջրվեժի ջրերի շնորհիվ։ Հայաստանի հարավում գտնվող այս բնության զարդը սիրելի վայր է թե' տեղացիների, թե' զբոսաշրջիկների համար։

4. Արենի գինու գործարան

Տուրի վերջում մենք այցելում ենք գինեգործության կենտրոն Արենի գյուղ, որտեղ մեզ հյուրընկալում է Արենի գինու գործարանը։ Մեր հյուրերը կարող են համտեսել հայկական տարբեր տեսակի գինիներ, այդ թվում նաև Արենի տեսակի խաղողից ստացված։ Կտեսնենք նաեւ մառանը, որտեղ ամբարված են գինիները, իսկ վերեւի հարկում կարող եք օգտվել գեղեցիկ սրճարանից։