Եղեգնաձոր Պատկերասրահ

Եղեգնաձորի պատկերասրահը Ազգային պատկերասրահի մասնաճյուղ է՝ հիմնադրված 1978 թվականին։ Այստեղ պարբերաբար կազմակերպվում են հայկական կերպարվեստի նշանավոր վարպետների աշխատանքների ցուցադրություններ, և պատկերասրահը Վայոց ձորում արվեստի սիրահարների ու մասնագետների հանդիպման վայր է։

Պատկերասրահն ունի երեք ցուցասրահ՝ երկուսը մշտական, մեկը ժամանակավոր ցուցադրությունների համար։ Այստեղ ներկայացված են 20-րդ դարի հայկական կերպարվեստի ականավոր ներկայացուցիչների աշխատանքներ բնանկարի, թեմատիկ նկարի, դիմանկարի և նատյուրմորտի ժանրերում։ Պատկերասրահում կա 21 թանգարանային առարկա (գեղանկար)։

Պատկերասրահում ներկայացված են Անատոլի Պապյանի, Վլադիմիր Սահակյանի, Հակոբ Անանիկյանի, Բաբկեն Քոլոզյանի, Հովհաննես Շարամբեյանի, Մանուկ Ղրդյանի, Էդուարդ Իսաբեկյանի, Փարավոն Միրզոյանի, Հենրիկ Սիրավյանի, Զաքար Խաչատրյանի և ուրիշների աշխատանքները։

Վերանորոգումից հետո մասնաճյուղի վերաբացումը համընկել է 13-րդ դարի վերջի և 14-րդ դարի առաջին կեսի գրիչ, մանրանկարիչ, քանդակագործ և ճարտարապետ Մոմիկ Վարդապետի (1260–1333/1339) ծննդյան 750-ամյակին նվիրված տոնակատարությունների հետ։ Պատկերասրահում ցուցադրվել են նաև Մոմիկի և նրա ժամանակակիցների աշխատանքները։