Ծռվիզ — Մորո Ձորո Վանք

Մորո Ձորո վանքը միջնադարյան հայկական ճարտարապետական հուշարձան է։ Իր բարգավաճման տարիներին այն կարեւոր հոգեւոր եւ մշակութային կենտրոն էր։

Վանքը գտնվում է Տավուշի մարզի Լուսահովիտ (նախկին Ծռվիզ) գյուղի մոտակայքում։

Վանքի Սբ. Աստվածածին եկեղեցին կառուցվել է 5-րդ դարում, իսկ 6-7-րդ դարերում սրբատաշ բազալտով վերակառուցվել են գմբեթակիր կամարները, գմբեթարդները եւ գմբեթը։ Մոնղոլական արշավանքներից հետո միաբանությունը ցրվել է, եւ եկեղեցին մինչեւ 19-րդ դարը գործել է որպես ծխական եկեղեցի։

Սբ. Աստվածածինը փոքր քառախորան կենտրոնագմբեթ եկեղեցի է՝ կառուցված մոխրագույն բազալտի տաշած քարերով եւ կրաշաղախով։ Կառույցը վկայում է այն շինարարական եղանակի մասին, որի դեպքում կոնստրուկտիվ տարրերն ու հանգույցները շարվում էին սրբատաշ, իսկ մնացած մասերը՝ անմշակ քարից․ այս եղանակը լայնորեն կիրառվել է 9-10-րդ դարերի Սյունիքի ճարտարապետության մեջ։