«Վերածնունդ» հուշահամալիր

Մարզ

Արագածոտն

Հեռավորությունը Երևանից

83.9 Կմ

Տեսակ

Հուշարձան/Հուշահամալիր

«Վերածնունդ» հուշահամալիրը նվիրված է Մեծ Եղեռնին, Ապարանի հերոսամարտին, ինչպես նաեւ Մեծ Հայրենական պատերազմում զոհված մարտիկների հիշատակին։ Այն գտնվում է Արագածոտնի մարզում՝ Ապարան քաղաքից մոտ 1.5 կմ հեռավորության վրա՝ բլրի վրա, Ապարանից Սպիտակ տանող մայրուղու ձախ եզրին։ Հուշարձանը կառուցվել է 1974-1979 թվականներին, ԽՍՀՄ ժողովրդական ճարտարապետ Ռաֆայել Իսրայելյանի նախագծով։ Իրականացման աշխատանքները կատարվել են նրա որդու՝ ճարտարապետ Արեգ Իսրայելյանի, ինչպես նաեւ քարագործ վարպետներ Հայկ Հովհաննիսյանի, Աղաբեկ Պապիկյանի եւ մի շարք այլ մասնագետների ջանքերով։ Հուշարձանի դիմային մասում տեղադրված է եռախորան հորինվածք՝ յուրաքանչյուր խորանի առջեւ կանգնեցված հուշասյունով։ Առաջին հուշասյան վրա նշված է․ «Մեծ եղեռնի նահատակներին»։ Երկրորդ սյանը, որն ունի թրի ձեւ, փորագրված է․ «Ապարանի ճակատամարտի հերոսներին»։ Երրորդ սյան վրա գրված է․ «1941-1945 թթ. Հայրենական մեծ պատերազմում զոհված ապարանցիներին»։ Հուշահամալիրը կառուցված է սեւ տուֆից, իսկ շրջակա մակերեսը պատված է բազալտե սալիկներով։