Կապտավանք

Կապտավանքը գտնվում է Տավուշի մարզի Չինչին գյուղից 5 կմ հարավ-արևմուտք։ Երբեմնի վանական համալիրից կանգուն է մնացել միայն եկեղեցին, որին կից եղել է ժամատուն, իսկ մոտակայքում՝ միաբանության բնակելի շենքեր ու գերեզմաններ։

Ըստ արևմտյան պատի արձանագրության՝ համալիրը կառուցվել է 12-րդ դարի կեսին և օծվել 1151 թվականին։ Արձանագրությունում եկեղեցին հիշատակվում է Սուրբ Աստվածածին անունով։

Եկեղեցին կառուցվել է կապտավուն բազալտե մեծ ու միջին քարերով, և ամենայն հավանականությամբ համալիրն իր անվանումը ստացել է քարի կապույտ գույնից։

Ասում են՝ Կապտավանքը կառուցել է ոչ հմուտ ճարտարապետ՝ առանց շինարարների հետ խորհրդակցելու։ Համալիրի մասին վկայությունները քիչ են, և պահպանվածներում այն հիշատակվում է «կաթողիկե», «վանք» կամ պարզապես «եկեղեցի» անուններով։

Եկեղեցու ներսում կան բազմաթիվ խաչքարերի բեկորներ՝ բուսաերկրաչափական զարդամոտիվներով։ Վանքը ժամանակին պարսպապատ է եղել, շուրջը տարածվել է հին բնակատեղի, իսկ տարածքը հարուստ է սառնորակ աղբյուրներով, գեղատեսիլ ձորերով ու անտառախիտ սարերով։