Աժդահակ Լեռ

Աժդահակը Գեղամա լեռնաշղթայի ամենաբարձր կետն է և գտնվում է շղթայի կենտրոնական հատվածում․ լեռան բարձրությունը 3597 մ է։ Այն հանգած հրաբխային կոն է, որը տարվա մեծ մասը ձյունածածկ է, իսկ լանջերը մերկ են։

Լեռան խառնարանն ունի 50 մ խորություն և 500 մ շրջագիծ։ Այնտեղ ջրի կուտակումից առաջացել է լիճ՝ Վիշապալիճ անունով։

Անունը ծագում է իրանական առասպելաբանության չար վիշապ Աժի Դահակայից, որի դեմ կռվում է ամպրոպի աստված Թրայետաոնան․ «աժի» նշանակում է իժ, օձ, վիշապ։ Հայկական բանահյուսության մեջ Աժդահակ անունը հայտնի է նաև որպես մարաց թագավորի ու վիշապի անուն։

Ճանապարհին կարելի է տեսնել ժայռապատկերներ ու վիշապաքարեր, որոնց վրա պատկերված են տարբեր կենդանիներ՝ ձկներ, վիշապ-հրեշներ և այլն։ Գեղամա լեռներում շատ են վիշապաքարերն ու ժայռապատկերները, որոնք մեզ են հասել մ.թ.ա. 4–5-րդ հազարամյակներից։