Կեչառիս վանական համալիր

Կեչառիս վանական համալիրը գտնվում է Ծաղկաձոր քաղաքում: Այս հոյակապ համալիրն ընդգրկում է չորս եկեղեցի, գավիթ, մատուռներ եւ շուրջ երեք տասնյակ խաչքարեր (11-17-րդ դարեր): Վանական համալիրը ձեւավորվել ու ամբողջացել է 11-13-րդ դարերում` Պահլավունի եւ Պռոշյան (Խաղբակյան) իշխանների ջանքերով։ Վանքի գլխավոր Սբ. Գրիգոր Լուսավորիչ եկեղեցին կառուցել է Գրիգոր Մագիստրոս Պահլավունին 1003 թվականին։ Եկեղեցին ունի երկու մուտք` արեւմտյան ու հարավային: Հարավային շքամուտքն ունի առանձնակի ճոխություն: Եկեղեցին ամբողջությամբ կառուցված է սեւ, սրբատաշ քարից, ներսից անսյուն է: Գլխավոր եկեղեցուց հարավ ընկած Սբ. Նշան փոքրիկ եկեղեցին, ամենայն հավանականությամբ, նույնպես կառուցել է Գրիգոր Մագիստրոսը` 1051 թվականին: 1203-1214 թվականներին Վեցիկ ճարտարապետը՝ իշխան Վասակ Խաղբակյանի աջակցությամբ, կառուցում է Կաթողիկե Սբ. Աստվածածին եկեղեցին։ Այս երեք եկեղեցիներից 120 մ հեռավորության վրա է գտնվում Սբ. Հարություն եզակի հատակագծային հորինվածքով եկեղեցին՝ կառուցված 1220 թվականին։ Համալիրի կարեւոր կառույցներից է Վեցիկ ճարտարապետի 13-րդ դարի մահարձան-խաչքարը, որը կերտել են նրա ճարտարապետ եղբայրներ Պետրոսը, Հովհաննեսը եւ Ազարիան: Վանքը դարերի ընթացքում բազմիցս ավերվել ու վերանորոգվել է: