Կարապի Լիճ

Կարապի լիճը գտնվում է Թումանյան և Տերյան փողոցների հատման անկյունում՝ Օպերայի և բալետի ազգային ակադեմիական թատրոնի շրջակա զբոսայգում։

1960-ական թվականներին Երևանի շոգ կլիման մեղմելու համար սկսեցին կառուցել արհեստական ջրային տարածքներ, և դրանցից առաջինը Կարապի լիճն էր՝ ստեղծված 1963 թվականին ճարտարապետ Գևորգ Մուշեղյանի նախագծով։ Լիճը Սևանա լճի փոքրացված տարբերակն է և ունի կղզի, որը կամրջակով միանում է արահետին։

Լիճն այս անունը ստացել է ի պատիվ Պ. Ի. Չայկովսկու հայտնի «Կարապի լիճ» բալետի։ Խորհրդային տարիներին լճում ապրում էին սպիտակ և սև կարապներ, սակայն 90-ականների սկզբին նրանք անհետացան։

Լճի մոտ 1965 թվականին տեղադրվել է քանդակագործ Սարգիս Բաղդասարյանի «Մեղեդի» քանդակը, իսկ 2003 թվականին՝ երգահան Առնո Բաբաջանյանի հուշարձանը, որի հեղինակներն են ճարտարապետ Լևոն Իգիթյանը և քանդակագործ Դավիթ Բեջանյանը։ 2005 թվականից ձմռանը լիճը վերածվում է սահադաշտի։