Մուղնու Սուրբ Գևորգ Եկեղեցի

Մարզ

Արագածոտն

Հեռավորությունը Երևանից

22 Կմ

Տեսակ

Վանք/եկեղեցի

Սբ. Գեւորգը, որն առավել հայտնի է որպես Մուղնու եկեղեցի, գտնվում է Արագածոտնի մարզի Մուղնի գյուղի հարավում։ Ենթադրվում է, որ եկեղեցին հիմնադրվել է 13-րդ դարի առաջին կեսին՝ Հովհաննավանքի միաբանության կողմից, որոնք այստեղ են տեղափոխել Սբ. Գեւորգի մասունքները։ Հայաստանի Սբ. Գեւորգ եկեղեցին եղել է հանրահայտ կրոնական եւ մշակութային կենտրոն։ 1278 թվականին այստեղ կատարվում էին ձեռագրերի ընդօրինակություններ: Եկեղեցին բազմիցս ավերվել ու վերականգնվել է, իսկ միջնադարում ունեցել է նաեւ դպրոց, որը հիմնադրվել է Աբել եպիսկոպոս Մխիթարյանի կողմից, ով հետագայում շարադրել է վանքի պատմությունը: Սբ. Գեւորգը կառուցված է սեւ, կարմիր եւ դեղնավուն տուֆից՝ գմբեթավոր բազիլիկի հորինվածքով։ Արեւմտյան կողմում՝ եկեղեցուն կից կա եռակամար բաց սրահ, որի վրա բարձրանում է զանգակատան 12 սյունանի ռոտոնդան։ Եկեղեցին հայտնի է իր բարձրարվեստ զարդաքանդակներով եւ 17-18-րդ դարերի հայ եկեղեցական գեղանկարչությանը բնորոշ որմնանկարներով, որոնք, կա հավանականություն, որ նկարազարդել է հայ միջնադարյան կերպարվեստի նշանավոր ներկայացուցիչներից Նաղաշ Հովնաթանը։ Վանքի բակում տեղադրված են մի շարք խաչքարեր, որոնցից ամենահինը՝ թվագրված է 932 թվական։ Մուղնու Սբ. Գեւորգի վանքը պատմության ընթացքում եղել է նաեւ բուժիչ սրբավայր։ Մարդիկ տարբեր հիվանդություններով եկել են այստեղ՝ բուժում եւ օրհնություն ստանալու համար։