Միջնադարյան հայ ճարտարապետության արժեքավոր հուշարձաններից մեկը՝ Կիրանց վանքը, գտնվում է Տավուշի մարզում՝ Կիրանց գյուղի մոտակայքում: XIII դարում հիմնված վանական համալիրն իր մեջ է ներառում երեք եկեղեցի, երկու գավիթ, սեղանատուն, բնակելի և տնտեսական շինություններ: Վանքը շրջապատված էր պարսպով, որից միայն ավերակներ են մնացել: Մինչև այսօր պահպանվել է դեպի հարավ-արևմուտք բացվող մեծ կամարակապ դարպասը: Այն կառուցվել է 13-րդ դարում։ Վանքի ստեղծման ժամանակ այստեղ բնակվել են քաղկեդոնություն ընդունած հայեր։ Գլխավոր եկեղեցուց արևելք տարածվել է վանքի գերեզմանոցը, ուր այժմ էլ պահպանվում է 1698 թ. թվագրվող արձանագիր տապանաքարը։