Բղենո-Նորավանք

Վանքը գտնվում է Սյունիքի մարզի Բարձրավան (Երիցաթումբ) գյուղից 3-4 կմ արևելք՝ Որոտան գետի բարձրադիր աջ ափին, անտառապատ կիրճերով շրջապատված եռանկյունաձև դարավանդի վրա։

Հատակագծային հորինվածքի յուրօրինակությամբ Բղենո-Նորավանքը հայ ճարտարապետության եզակի հուշարձաններից է։ Առանձնակի շեշտված է արևմտյան ճակատի քանդակազարդ շքամուտքը։

Եկեղեցու արտաքին պատերին՝ սալաքարերի վրա, զետեղված են Քրիստոսի կյանքը պատկերող բարձրաքանդակներ։ Պահպանված ութ սալաքարերից իրենց տեղում են միայն երկուսը՝ «Ավետումն» ու «Համբարձումը», մնացածը վայր են ընկել։

989 թվականին Բղենո-Նորավանքում ընդօրինակվել և նկարազարդվել է «Էջմիածնի Ավետարանը»։