Բովուրխանավանք

Բովուրխանի (կամ Բաղիրխանի) վանքը գտնվում է Արցախի Հանրապետության Ննգի եւ Քռասնի գյուղերի միջեւ՝ համանուն լեռան հյուսիսային լանջին, շրջապատված փարթամ անտառներով։ Վանական համալիրը ներառում է միանավ, թաղածածկ եկեղեցի, վանահոր սենյակ, միաբանների խցեր, տնտեսական սենյակներ եւ պարսպապատ։ Շենքերը կառուցված են տեղական դեղնասպիտակավուն կրաքարից, հիմնականում անտաշ կամ կոպտատաշ քարով։ Միայն վանահոր սենյակի լուսամուտի ու դռան անկյունաքարերն են սրբատաշ։ Սենյակը կից է համալիրի արեւմտյան պարսպապատին։ Հարավային կողմից պարսպապատին կից են միաբանների չորս խցեր, կլոր աշտարակ ու մեկ սենյակ։ Խցերը միմյանց հետ հաղորդակցություն չունեն՝ յուրաքանչյուրն ունի առանձին մուտք, որը «անապատ» տիպի կառույցների հատկանիշ է։ Դրանք ունեն միանման չափեր, երկուսում առկա է ներսից լայնացող լուսամուտ՝ բացված գլխավոր պարսպից։ Աշտարակին կից սենյակը ունի ուղղանկյուն հատակագիծ, ձգված է արեւելք-արեւմուտք ուղղությամբ, թաղածածկ է, իսկ արեւմտյան պատի կենտրոնում՝ երկու խորշերի միջեւ, կառուցված է բուխարի։ Վանական համալիրից առավել լավ պահպանված կառույցը եկեղեցին է։ Այն ուշ միջնադարին բնորոշ միանավ բազիլիկ եկեղեցի է՝ 9.65 մ երկարությամբ եւ 5.50 մ լայնությամբ. Կիսաշրջան թաղը հենվում է մեկ զույգ որմնասյուների վրա։ Արեւելքում գտնվում է ավագ խորանը՝ մեկ լուսամուտով։ Հարավային ճակատում եւս կա երկու լուսամուտ։ Եկեղեցուն հյուսիսից կից է ավանդատունը՝ ուղղանկյուն հատակագծով։ Դրա դուռը բացվում է եկեղեցու սրահ, իսկ հյուսիսային կողմը արտաքինից ամբողջությամբ թաղված է հողի մեջ։