Շուշիի Սբ. Ամենափրկիչ Ղազանչեցոց եկեղեցի

Մարզ

Արցախ

Հեռավորությունը Երևանից

339.7 Կմ

Տեսակ

Վանք/եկեղեցի

Շուշիի Սբ. Ամենափրկիչ Ղազանչեցոց եկեղեցին սկզբնապես փայտաշեն է եղել։ 19-րդ դարի կեսերին փայտե կառույցը փոխարինվել է քարե եռանավ բազիլիկով, որն արդեն 1847 թվականին վթարային էր։ Բաղդասար մետրոպոլիտը երկարատեւ նամակագրությունից հետո որոշում է կառուցել նոր եկեղեցի։ Նախագծային աշխատանքները սկսվում են 1867 թվականին, հաստատվում 1868-ին, իսկ շինարարությունն ավարտվում է 1887-ին՝ ճարտարապետ Սիմեոն Տեր-Հակոբյանցի եւ վարպետ Ավետիս Յարամիշյանցի ղեկավարությամբ՝ համայնքի հանգանակությամբ. Տաճարը խաչաձեւ-գմբեթավոր է, ունի երեք մուտք, բազմանիստ նախասրահներ, բարձր լուսամուտներ ու հարուստ հարդարանք։ Մայր տաճարի նմանությամբ այն ունի կենտրոնական գմբեթ՝ թմբուկով եւ հովհարաձեւ վեղարով։ Պատերին կան բազմաթիվ հայերեն արձանագրություններ։ Զանգակատունը կառուցվել է 1858 թվականին՝ շուշեցի Աբրահամ Խանդամիրյանցի նախաձեռնությամբ՝ ի հիշատակ Գաբրիել Հովսեփյան-Բատիրյանցի եւ ղազանչեցիների։ Այն եռահարկ է, ներքեւում՝ կամարավոր բացվածքներով, վերեւում՝ հրեշտակների արձանիկներով, պսակված հովհարաձեւ վեղարով։ Զանգակատունը կառուցվել է ավելի վաղ, քանի որ նախկինում նույն տեղում գտնվել է 18-րդ դարի փայտաշեն եկեղեցի։ Տաճարն ու զանգակատունը կառուցված են սպիտակ սրբատաշ կրաքարով եւ կազմում են Շուշիի ճարտարապետական դոմինանտը։