Գրիգորի Գաբրիելյանցի անվան երկրաբանության պետական թանգարան

Այն Շուշիի երկրաբանական թանգարան էր, որը հիմնադրվել է 2014 թվականի մայիսին և պաշտոնապես բացվել նույն տարվա սեպտեմբերի 1-ին՝ երկրաբան Գրիգորի Գաբրիելյանցի նախաձեռնությամբ։ Այն համարվում էր Կովկասի ամենամեծ երկրագիտական թանգարաններից մեկը։

Թանգարանը գտնվում էր Շուշիի 19-րդ դարի պատմական շենքերից մեկում՝ Մաշտոցի 32 հասցեում, նախկինում «Կանաչ դեղատուն» անունով հայտնի կառույցում։

Գրիգորի Գաբրիելյանցը խորհրդային շրջանում ճանաչված երկրաբան էր, երկրաբանա-միներալոգիական գիտությունների դոկտոր, պրոֆեսոր։ Նա Արցախին նվիրեց իր անձնական հսկայական հավաքածուն, և թանգարանը ստեղծվեց նրա նախաձեռնությամբ։

Գաբրիելյանցի նվերը ներառում էր աշխարհի 40 երկրներից հավաքված հանքաքարերի, լեռնային ապարների և օրգանական բրածոների ավելի քան 403 նմուշ, իսկ ցուցադրության մեջ կային նաև Արցախի տարբեր շրջաններից հավաքված հանքաքարեր ու օգտակար հանածոներ։ Հավաքածուն ներառում էր 450-ից ավելի քարերի, ապարների և հանքանյութերի տեսակներ, իսկ ամենահին ցուցանմուշը մոտ 200 միլիոն տարեկան էր։